Doas Reißa

zwee aale Weibla finga oan zu kreißa,

Weil doß se und die hotta siehr is Reißa..

Und weil se und die hotta`s goar zu siehr,

Doo krießa se sich`s halt a bißla vür.

Die erschte sproach: „Du gleebst merrsch nich, Kalliene,

Doas kimmt derr unda aus derr grußa Ziehne,

Doo zwickt mich`s monchmoll, doß iech pläka muuß,

Dernoo macht`s rüber ei a linka Fuuß.

Vom linka Fusse kimmt`s und fährt derr jitze

Uff eemoll ruff bis ei die Noasaspitze

Und urbert ei derr Noasaspitze rimm

Und koaschelt bis zum Rückadrohte nimm.

Eim Rückadrohte kimmt`s dernoo gekrucha

Und zieht derr kreuz und quar durch olle Knucha.

Uff eemoll hopst merrsch ei a Dauma-Noal;

jekersch, jekersch nee, ies doas `n Quoal!

Denn hoa iech`s erscht hier ei dam Dauma-Noale,

Dernoo doo hoa iech`s äbenst glei üb`roale.

Eim Rücka sticht`s, eim Beene zieht`s und zwickt`s

Und wie mit Masserspitza hackt`s und pickt`s.

Uff eemoll aber - `s ies derr wie a Wunder -

Fährt`s wieder ei die gruße Ziehne nunder.“

Die zweete sproach zur erschta: „Ju ju, ju ju,

Doas gieht merr nämlich ganz genau asu.

Vom Reißa koan iech derr a Liedla singa,

Bei mir fängt`s nämlich immer oan voo hinga.

Doo zieht`s zuerschte zieht`s eis Kreuze nei,

Doo schmär iech merrsch mit Offafetze ei,

Drei Tage hoa iech`s monchmoll ei dam Kreuze,

A vierta Taag doo fährt merrsch eis Gepläuze,

Doo reßt merrsch reen die Därme reßt merrsch raus,

Dernoo macht`s durch die Noasalöcher naus!

Doch wenn de etwand denkst, is wär jitz haußa,

Ock fümf Minuta hüchstens ies derrsch draußa.

Iech dräh miech üm, doo huckt merrsch wieder uuf,

Doo läh iech merr a Floster läh iech druuf;

Doas Floster luß iech sieba Taage druffe,

A achta Taag, wenn iech uff Bess´rung huffe,

Fährt`s durch a Nacka nuff und kimmt ei`s Uhr,

Doo ies voo Bess`rung wieder keene Spur.

Denn aus dam Uhre macht sich`s ei die Finger

Und ei a Fingern roatbert`s lang ahinger

Ei`s Handgelenke nuff bis ei a Orm,

Zum Orme naus und nunder ei aDorm.

Zuletzte urbert`s ei mem hohla Zoahne,

Als wenn ees foahrn tät mit emm Kostawoane.“

Die erschte sproach zur zweeta: „Ju ju, ju ju,

Doas gieht merr nämlich ganz genau asu.

Iech duchte stäts, iech hätt`s ock bluß alleene,

Nu, Goot sei Dank, doo ies ju oo noch eene,

Die oo asu is Reißa hoot wie iech;

Und weil iech doas jitz weeß, doo trüst iech miech.“

Ernst Schenke